Valter Augusto Deusdado, naciu a 4 de febreiro de 1952, an Zenízio, cunceilho de Miranda de l Douro. Ende fizo la scuola purmária, ajudando ls pais nas lhidas de l campo. Até als dezassiete anhos fui fazendo todo l que era la lhida de lhabradores, mas debrebe tubo gana de coincer l Mundo i mudar de bida. Ye cun essa eidade que bai pa la Marina. Ende fai ls studos para salir cergento cun 22 anhos, al miesmo tiempo fai todo l curso de ls liceus. Mas cuntina a tener ganas de saber mais i por esso se matricula ne l Anstituto Superior Técnico, adonde se formou an angenheiro. Na Marina cuncuorre al curso de oufeciales i ye nessa culidade que bai a coincer muito Mundo, chubindo andrento la marina até la patente de capitan de mar i guerra. La lhigaçon a las ouriges fui siempre mui fuorte i lhougo que tubo ouportunidade de daprender a screbir l Mirandés, sue lhéngua de nino i de la mocidade, nun parou mais. La scrita era una cousa que siempre l zlhumbrara, por poder cumponer las palabras i ‘cun eilhas amanhar cuontas, mais ou menos lhargas, algunas deilhas publicadas an blogues de Lhéngua Mirandesa i ne l Jornal Nordeste.